Vaj Tswv Ntuj Txoj Kev Hlub

Vaj Tswv Ntuj muaj txoj kev hlub loj dua ntais vim nws yog tus tsim tas txhua tsav yam nyob rau hauv lub ntiaj teb no. Nws hlub peb tib neeg dua ntais txhua tsav yam uas nws tau tsim tseg los. Txhua tsav yam uas noj tau ntawd nws cia los ua zaub yug peb lub cev nqaij daim tawv thiab peb txoj sia kom peb thiaj nyob taus ua neeg rau lub ntiaj teb no. Nws hlub peb vim nws tsim tau peb zoo li nws. Txawm nws muab av puab peb xwb los nws twb muab tau txoj sia thiab txoj pa thiab tus ntsuj plig rau peb lawm. Peb twb zoo li nws lawm. Peb tib neeg ntiaj teb yog leej twg lees paub peb leej txiv Tswv Ntuj thiab nws leej tub uas yog peb tus Tswv Yexus mas peb yuav tau txais Lee Txiv Tswv Ntuj txoj kev hlub. Yog thaum peb tau ua tej yam txhaum lawd, peb lees txhaum thov peb leej Txiv Tswv Ntuj thiab peb tus Tswv Yexus ces peb lub txim txhaum yuav poob mus. Peb yuav dim peb lub txim txhaum. Peb yuav nco qab ntsoov hawm peb tus Tswv. Peb yuav tsum ua txhua tsav yam kom zoo thiab thiaj yuav tau txais kev zoo. Peb yuav tau zam txhaum rau lwm leej lwm tus, peb tus Tswv Ntuj thiaj yuav zam txhaum rau peb thiab. Peb leej Txiv Tswv Ntuj yog tus hlub peb tib neeg dua ntais vim nws yog tus tsim peb. Nws thiaj tso nws leej tub uas nws hlub tshaj plaws los tuag theej tib neeg ntiaj teb lub txhoj los yog lub txim txhaum. Nws yog lub paus thiab lub ntsis.